O presidente da Associaçom Galega de Amizade com a Revoluçom Bolivariana, Xavier Moreda, leva com orgulho o apelido de seu avô, barbeiro e reconhecido gaiteiro assassinado por falangistas no 36, ao igual que cerca de umha dúzia de membros da sua família.
Xavier nom só é conhecido pola sua solidariedade internacionalista com o povo da Venezuela, pois tem sido activo militante da memória histórica em Vigo durante anos. O compromisso democrático da sua família levou-a a ser cruelmente assassinada polo fascismo espanhol. Porém, a semente vermelha de seus familiares cresceu viçosa neste cabeleireiro viguês de insubornável compromisso com a Galiza e as suas classes trabalhadoras.
DL -A AGARB (Associaçom Galega de Amizade com a Revoluçom Bolivariana) é umha entidade que nos últimos anos tem feito diferentes iniciativas para dar a conhecer o processo revolucionário venezuelano e coordenar a solidariedade do movimento popular galego com a revoluçom bolivariana. Como avalias o trabalho feito pola associaçom que presides?
Umha avaliaçom muito positiva pois houvo sempre por parte dos cônsules da Venezuela umha sensibilidade muito grande por ser o movimento bolivariano um movimento emancipador. Portanto, como AGARB, como entidade galega, nacional, é muito importante esta componente emancipadora.
O consulado mostrou desde o primeiro dia umha abertura total. Isto permitiu que houvesse um achegamento muito rápido e umha participaçom em actos institucionais.
Nunca se deu na Galiza semelhante cousa porque o consulado sempre foi até agora consulado do reino de Espanha. Modificar esta realidade sempre é difícil e, naturalmente, surpreendente. Mas o consulado na Galiza tem mostrado, como digo, um apoio absoluto à AGARB.
Temos feito diferentes actividades. Tivemos a oportunidade de conhecer Gonzalo Gómez (galego-venezuelano fundador de Aporrea), por exemplo, por um conduto institucional, cousa que também permitiu que a AGARB fosse reconhecida institucionalmente. E nós ficamos muito contentes com este reconhecimento, pois achamos fundamental sermos reconhecidos a nível institucional pola Venezuela e nom termos complexos a respeito disto. Ter umha entidade para falar de tu a tu.
DL - Polo que dis existe por parte do Governo Venezuelano umha compreensom da realidade nacional galega, cousa que é um problema na América Latina, pois nom todos os governos do continente, mesmo de esquerda e revolucionários, compreendem a existência de naçons sem estado na Europa e, no nosso caso particular, as naçons da Península Ibérica. Existe essa compreensom entom?
Existe essa compreensom de facto. Nom oficialmente, evidentemente, umha vez que o consulado é consulado perante o Reino de Espanha e nom perante a República Galega, porque ainda nom existimos como tal, mas sim sabemos que o movimento bolivariano reconhece as diferentes naçons que existem dentro do seu próprio território, nom de umha maneira territorial mas sim admite, pola primeira vez na Venezuela, que existem essas naçons, esses povos originários. E, portanto, creio que existe essa mesma sensibilidade por parte dos novos diplomatas venezuelanos, que nom som diplomatas de carreira e que representam muito bem o processo revolucionário em marcha na Venezuela.
DL - Qual é o papel que pode jogar a Galiza e os movimentos populares e de esquerda galegos em relaçom a essas dinámicas revolucionárias que estám a verificar-se tanto na Venezuela como no continente Latino Americano?
Mais do que poderia eu diria o que deveria. Nom podemos esperar que venha alguém com umha varinha mágica e nos reconheçam como naçom. Nós devemos exigir, em todo o momento, de umha maneira cordial, mas exigir sempre, que nós somos umha naçom, isto nom é discutível e, portanto, estejamos onde estivermos, sempre temos que fazer valer a nossa voz ao mesmo nível que o resto de vozes.
Nom podemos ir à Venezuela, onde som socialistas, bolivarianos, revolucionários... e que se pense na chave espanhola, reaccionária, que a Galiza fai parte de Espanha e, portanto, é Espanha. Nom, Galiza nom é Espanha. Somos das naçons mais antigas da Europa ocidental. A nossa realidade, se bem nom é a que queremos, temos de atingir que seja a que pretendemos. Se afinal, por exemplo, for avante a V internacional, a Naçom Galega tem que ser reconhecida como umha naçom em pé de igualdade com o resto de naçons do mundo.
Más información:
Si quieres contribuir a que Kaos en la Red pueda seguir publicando artículos como este, puedes hacer tu donación en:
| Paypal (seguro y permite diferentes formas de pago) |
Microdonación de 2 euros
| Donación de importe libre
|
|