Segundo destaca Equanimal nun comunicado, a sabotaxe resultou "un éxito", xa que conseguiron "impedir a morte de moitos raposos a mans dos cazadores". Este é o cuarto ano consecutivo no que entorpecen o desenvolvemento do torneo.

Non obstante, a organización de defensa dos animais denuncia "coacción constante" por parte das forzas e corpos de seguridade do Estado, ao asegurar que varios activistas foron multados "con cargos falsos" por supostas infraccións do código de circulación "que non cometeran".

Entre outras accións, sinala o rexistro de vehículos, "todo iso cunha finalidade: impedir que escorrentasen os raposos para salvarlles a vida".

Así mesmo, acusa as cuadrillas de caza de realizar "ameazas de morte e intentos de agresión", xa que, segundo relata, "chegaron a lanzar pedras" contra os defensores dos animais".

Para rematar a xornada, Equanimal convocou unha concentración en Portomarín, onde os activistas leron un manifesto para explicar "porqué consideran que a caza non é máis que o asasinato de animais indefensos".