Actualizado às 17h30
A luita concluiu com a retirada das forças policiais, deixando mais de 30 feridos e feridas segundo a última contagem. As massas obreiras resistírom com barricadas às portas da factoria de Barreras, no bairro das Bouças, na cidade de Vigo.
Com a cidade convertida num campo de batalha urbano, dúzias de obreiros e obreiras, vizinhança e alguns polícias ficárom feridos durante os duros confrontos ao longo da manhá.
Para a semana, antes da greve indefinida que começará provavelmente quarta-feira, será convocada umha grande manifestaçom a que o proletariado do sul da Galiza vai convocar todo o povo trabalhador galego, contra a brutalidade repressiva e em solidariedade com a luita dos metalúrgicos.
Actualizado às 13h30.
Volta a violência policial e a resposta operária às ruas de Vigo na sexta jornada de greve
A polícia espanhola, com impressionantes reforços chegados de diferentes pontos do Estado, voltou a protagonizar agressons contra trabalhadores, que respondem nestes momentos contundentemente.
Milhares de manifestantes voltárom a ocupar as ruas de Vigo desde primeira hora da manhá, na sexta jornada de greve do sector metalúrgico no sul da Galiza. A polícia espanhola voltou a provocar violência ao agredir os trabalhadores. Nestes momentos, há duros confrontos nas redondezas dos estaleiros Barreras na cidade galega, contabilizando-se já os primeiros feridos.
A mobilizaçom operária estava perto da Estaçom Marítima de Vigo quando começárom os disparos de boas de borracha por parte das forças de choque da polícia espanhola. Contentores de lixo a arder indicavam que os operários nom iriam render-se à violência policial e aí começou um confronto que continua ao longo de toda a manhá, de umha intensidade superior aos vividos ontem.
Os obreiros estám a defender-se dos ataques policiais com barricadas, pedras e parafusos, além de petardos. Alguns meios falam de um jornalista ferido e da tentativa dos operários de tomar a sede do concelho, que polos vistos sofreu o lançamento de umha chuva de pedras, e da tentativa de ocupaçom do cruzeiro 'Independence of the sea', e do centro comercial A Laxe.
Crónica de um camarada participante nas mobilizaçons de hoje, para Primeira Linha em Rede
À primeira hora da manhá, antes das 7 horas que como é habitual no sector, o proletariado do sul da Galiza concentrava-se às portas de fábricas e estaleiros. Em Vigo, depois das afirmaçons do dia anterior na boca de um dos responsáveis sindicais de que a nossa resposta seria proporcional e sempre maior, as trabalhadoras e trabalhadores fomos levadas e levados à procura de umha acçom mais mediática do que eficaz. À tentativa ingénua deocupaçom do centro comercial A Laxe e de abordagem de um cruzeiro de viagens, a polícia espanhola respondeu com contundência e sem medo, sabendo da sua situaçom de poder e impunidade.
Os disparos da polícia procurárom e atingirom os grandes vidros de prédios de habitaçom e do hotel Miramar, cujos pedaços caírom sobre as e os manifestantes. A carga dividiu e dispersou o contingente proveniente do estaleiro Barreras. Um otro grupo que vinha de Vulcano foi dispersado também e parte do proletariado reagrupou-se posteriormente na Praça do Concelho, onde umha outra carga provocava umha nova dispersom.
Houvo cargas policiais desde as nove da manhá até a umha, um pouco por todo o núcleo urbano de Vigo às quais se respostaba com coragem e sem meios depois do fracaso das acçons que se tinham programadas para hoje como resposta a actuaçom policial de ontem e como pressom para a negociaçom do convénio.
Em Barreras houvo novamente resistência operária que demonstrou a capacidade de luita e vitalidade na qual se acha o proletariado do sul da Galiza, que tem que fazer frente continuamente ao núcleo mais duro e reaccionário do patronato da Galiza. Os métodos de luita alcançavam um maior desenvolvimento do que no dia anterior, sendo aínda quantitativamente escasos e insuficientes. Um camionista atravessou o seu veículo para defender as e os manifestantes da barbárie policial.
Nos arredores de Barreras, polícias de choque, vindos de diferentes pontos de fora da Galiza, faziam todo para evitar que chegasssem apoios àqueles e aquelas que resistiam em Barreras, carregando continuamente nas ruas próximas. Quando escrevo estas linhas, sabe-se de 20 companheiros e companheiras feridas polas violentas acçons repressivas.
Polas 13h30 tinha lugar umha assembleia às portas desse astaleiro em que se denunciava a brutalidade policial, anunciava-se umha conferência de imprensa à tarde para o fazer diante dos meios e também que, além das jornadas de luita marcadas no dia anterior, vai convocar-se umha manifestaçom convocando todo Vigo à solidariedade como o sector.
http://primeiralinha.org/home/?p=2271
Crónica de Vieiros
13h00: Os antidisturbios retíranse, e os operarios reúnense en asemblea
Por volta das 12h15, os antidisturbios que se mantiñan no contorno do estaleiro de Barreras, fóronse retirando. Os operarios concentráronse, daquela, en Beiramar, e foise recuperando a normalidade na zona. Porén, quedaron as pegadas dos enfrontamentos, como as barricadas armadas polos traballadores, os parafusos guindados dende o estaleiro ou as pelotas de goma lanzadas polos antidisturbios.
Arestora, os obreiros prepáranse para unha asemblea, na que se avaliará a sexta xornada de paro, e decidirase como enfrontarse aos días de folga programados para a vindeira semana. A partir da vindeira cuarta feira, os obreiros volverán parar, e continuarán en folga até a sexta, día no que se declarará un paro indefinido. Está previsto que se unan a este paro, a partir da sexta feira, todas aquelas empresas do sector do Metal que funcionan con convenio propio, coma os grandes estaleiros, PSA Peugeot-Citröen e algunhas empresas auxiliares da automoción, entre outras.
Finalmente o balance de feridos quedou en 10 policías -segundo a subdelegación do goberno español-; e polo menos 20 feridos, por parte dos traballadores do metal; e un cámara da cadea de televisión madrileña Telecinco. Que se saiba, non houbo ningún detido.
Os empresarios advirten que os estaleiros de Vigo poderían pechar
O representante da patronal do sector do Metal, Enrique Mallón, sinalou esta quinta feira que os sindicatos "deberían explicarlles aos obreiros de onde van sacar os cartos que están deixando de gañar estes días". Mallón tamén advertiu que este paro está a lle facer moito dano aos estaleiros de Vigo, dicindo que moitos deles "poderían verse obrigados a pechar". Os empresarios cifraron en 15 millóns de euros as perdas provocadas por estes días de paro, e lembraron que a partir desta sexta feira retirarán a súa oferta para a reforma do convenio.
12h00: Os traballadores refúxianse en Barreras, ocupan un centro comercial e a zona de Peritos
Os enfrontamentos entre operarios do metal e antidisturbios continúan no contorno do estaleiro de Barreras, na zona de Beiramar. Tal e como aconteceu esta cuarta feira, os traballadores refuxiáronse no estaleiro, dende onde responden ás pelotas de goma lanzadas pola policía, con parafusos, pedras e petardos. A media mañá xa hai varios feidos, entre eles, segundo informarona na Radio Galega, un cámara da cadea madrileño Telecinco, que foi alcanzado por un petardo.
Todo o contorno de Barreras está controlado polos antidisturbios, que se sitúan na rotonda de Beiramar. Porén, hai grupos de obreiros ocupando o centro comercial deToys'R'us, e outros na zona de Peritos. O tránsito está cortado en toda a zona, así como nas Rúa Coruña e algúns accesos á Praza América, onde se sitúan outros grupos de obreiros do metal.
11h00: Os operarios tentan ocupar a Casa do Concello
Os traballadores trasladáronse de Beiramar á Praza do Rei, onde se atopa a Casa do Concello, que tentaban ocupar. Porén, no Concello de Vigo xa estaban en sobreaviso, polo que as portas do predio permanecían fechadas dende as 08h30 da mañá.
Na mesma praza continuaron os enfrontamentos coa policía, lanzando os axentes pelotas de goma; e os traballadores pedras, obxectos das obras e parafusos. Houbo, polo menos, un ferido nestas cargas: un operario que recibiu un impacto dunha pelota de goma na cabeza, e que foi trasladado a Povisa. Tamén se queimaron varios contedores.
Un grupo de traballadores dirixíanse cara Camelias, mentres outros se dispersaban por outras zonas da cidade, seguidos polos axentes da policía española. Arestora, continúa a tensión nas rúas do centro de Vigo.
10h25: Os traballadores ocupan a Estación Marítima
Após os incidentes rexistrados esta cuarta feira, os obreiros do metal organizáronse para saír en manifestación, de novo, na quinta. Saían de mañá do estaleiro Barreras, en Beiramar, e camiñaban cara o centro, cando se atoparon cunha barreira formada pola policía española entre a Estación Marítima e o Hotel Bahia.
Nesta zona comezaron, por volta das 10h00, os enfrontamentos coa policía, ao tentaren os operarios atravesar a barreira. Os axentes lanzaron pelotas de goma, mentres os operarios continuaban o seu camiño.
Por volta das 10h15, os traballadores entraron na Estación Marítima, e ocupárona, impedíndolle a saída a 12 autobuses cargados con pasaxeiros dun cruceiro que está atracado no porto de Vigo. Ás portas xuntáronse por volta dun cento de axentes da policía, e varias grilleiras. Con eles os representantes dos sindicatos -Antolín Alcántara, pola CIG; e Ramón Sarmiento, por CCOO- negociaron, indicándolles a súa intención de permanecer na Estación Marítima, e evitar un desaloxo forzado. Finalmente, por volta das 10h20, os traballadores foron abandonando o seu peche, berrando, entre outros lemas "Solución convenio do metal!".
Por outro lado, dende o Concello de Vigo pedíronlle á Xunta que actúe con dilixencia na mediación entre os sindicatos do Metal e a patronal. O voceiro PSdeG e presidente da Mesa de Contratación de Vigo, Carlos López Font demandou unha axuda real do Goberno, e pediulle ás partes que vaian limando os seus desencontros.
http://www.vieiros.com/nova/74545/os-enfrontamentos-entre-operarios-e-a-policia-deixan-polo-menos-20-feridos
Más información:
Si quieres contribuir a que Kaos en la Red pueda seguir publicando artículos como este, puedes hacer tu donación en:
| Paypal (seguro y permite diferentes formas de pago) |
Microdonación de 2 euros
| Donación de importe libre
|
| 
