Ao contrário do que se afirma desde a correcçom política, as caixas já nom som entidades dinamizadoras da economia dos humildes, nem tampouco instituiçons empenhadas na obra social com participaçom política. Pouco se diferenciam da banca, como Caixa Galicia está a demonstrar.

 

Caixa Galicia participa quinze grandes empresas, algumhas delas nem galegas. As mais afamadas som Sacyr ou Pescanova, mas tampouco podemos esquecer Norvento ou Reganosa. Segundo cifras da pópria caixa, estas e outras empresas participadas pola instituiçom que preside José Luis Méndez aumentárom facturaçom e emprego nos últimos anos.

 

 

De todos os conglomerados em que inviste a Caixa, a grande construtora Sacyr acha-se em primeiro plano de lucros conseguidos. Esta empresa faz negócio também em Portugal, Chile, e recentemente ganha mercados na Irlanda e a Costa Rica. Além de centrar-se na construçom, diversifica a sua actividade e dirige-se à exploraçom de energias renováveis (solar e biomassa).

Quanto a Pescanova, a grande transnacional da alimentaçom, originária de Vigo, expande-se por 120 países e tem organizado um vasto holding destinado à industrializaçom dos produtos pesqueiros. Com umha política de permanente expansom pola América Latina, prepara o assalto definitivo às Rias Galegas com um ambicioso plano acuícola. Depois de os portugueses permitirem a instalaçom dumha piscifactoria em Mira (Portugal), o apoio do PP e dos alcaldes da zona pode levar a umha nova construçom em Tourinhám.

A dedicaçom accionarial demonstra como Caixa Galicia privilegia estas duas linhas de negócio, carregadas de futuro: energias renováveis, infraestruturas, e industrializaçom da costa. Atrás ficou o seu compromisso com Ence, pendente de translado da ria de Ponte Vedra, e da histórica Fenosa, agora absorvida pola transnacional espanhola Gas Natural.