Os resultados das eleiçons europeias constatam que nengum tipo de mudança social de alcanço virá dos parlamentos. O discurso típico do neoliberalismo, que encumbrou Sarkozy ou Feijoo, que apela à “austeridade” no que atinge aos direitos sociais conseguidos após anos de luita operária e campesina, triunfa mais umha vez num contexto de crise, nom  docapitalismo, senom  no  capitalismo. Na Galiza, a abstençom ficou em 52,72%, algo menos do que quatro anos antes. Aliás, os votos nulos e em branco  duplicárom-se praticamente, o que pode seguramente demonstrar que cresce a rejeiçom politizada à democracia formal do liberalismo.

Debulhando os resultados por partidos, o PP é de novo vencedor com 50,68% dos votos, seguido do PSOE, e ambos os dous mui por diante do BNG, que continuando com a sua queda em picado atinge só 102.326 votos (9,40%), longe dos 141.756 do 2004 e a anos luz dos 335 mil (21,98%) das eleiçons de 1999. Percentualmente, até fôrom melhores resultados os de 1994, já que com só 32 mil votos, chegou-se a 11,4%. A sangria de votos nom parece provocar ainda nengum debate de calado nas fileiras nacionalistas que, aliás, continuam sem um liderado carismático. Como apontou Ernesto Vázquez Souza nas últimas semanas, umha das herdanças do piñeirismo é precisamente esta eiva estrutural do nacionalismo: umha carência de tecido organizativo mui forte, que é suplido por figuras carismáticas. Piñeiro –diz Vázquez Souza– “Definiu um tipo de galeguismo não insititucional, e portanto ainda que político, não estrutural. Apenas centrado em figuras líderes insustituíves ("persoeiros") ainda que com aparato legitimador...” Desta óptica é fácil entender umha das faces da crise do BNG, que é a dificuldade de encontrar-lhe renovaçom a X. M. Beiras quem, aliás, aos seus 73 anos se apresenta como vanguarda renovadora do nacionalismo. 

Tampouco fôrom bons os resultados em Galiza para Iniciativa Internacionalista, candidatura para a que pediram o voto a maioria das organizaçons independentistas, e da que faziam parte vários militantes da FPG, entre eles X. L. Méndez Ferrín, no posto 6 da lista. Conseguírom 3.373 votos (0,31%), sendo a sétima força, Esta candidatura, pola contra, foi a 4ª força no País Basco, com 115 mil votos, empatados com o Partido Popular. Também em Euskal Herria, em Navarra, fôrom a terceira força, com 22.985 votos. Finalmente atingírom 175 mil votos em todo o estado, sem poder conseguir um escano.

Graves incidentes com a candidatura de Iniciativa Internacionalista nos colégios eleitorais

Para além de todos os intentos da justiça espanhola de ilegalizar a candidatura –numha das estampas mais escandalosas dos últimos anos do estado “de direito” espanhol–, assim como a sabotagem contínua à que a guarda civil e a polícia espanhola a submeteu em campanha (tal e como informárom de Ceivar), a própria jornada eleitoral tampouco transcorreu com normalidade. Na página http://twitter.com/iniciativainter vários activistas anotavam a cada hora da jornada os múltiplos incidentes que se registrárom: ausência de papeletas, negligências por parte de interventores doutros partidos, recontos irregulares, actas ilegais, etc. Pola rede galega também circulam denúncias de irregularidades; como o caso dum/ha votante de Ourense que nom encontrou nas cabinas papeletas nem de Iniciativa Internacionalista nem de Izquierda Anticapitalista, (ver em: http://www.moendo.net/2009/06/07/hai-boicot-do-bng-a-iniciativa-internacionalista/). A Junta Central recebeu também umha denúncia na que se acusava à cadeia de televisom CNN+ polo que considerárom “um ataque intolerável face a nossa candidatura, cujo único objectivo é o de perjudicar-nos eleitoralmente”, em referência a umha retransmissom de dito canal no que criminalizava II-SP.

Com efeito, o simples facto de que umha candidatura anti-sistema (querendo dizer com isto anti-capitalista e defensora do direito à autodeterminaçom dos povos) se apresente às eleiçons é causa de numerosos ataques e silenciamentos mediáticos que pretendem invisibilizar qualquer rebeliom.

II-SP nom conseguiu cristalizar-se como referência para o independentismo

Se bem na constituiçom das listas de Iniciativa Internacionalista só figuravam pessoas da FPG e afins, com Méndez Ferrín de cabeça numha discreta sexta posiçom, a prática maioria do independentismo pediu o seu voto para a candidatura, como se soubo polos comunicados públicos de NÓS-UP e AMI. 

As referências para valorizar estes resultados, que conseguírom 3.373 votos, som difíceis de constatar. O voto anti-sistema representado pola candidatura basca de HB na Galiza, nas eleiçons europeias de 1987, conseguira chegar até a cifra de 7.242 (0,59% dos emitidos). O pretendido efeito de sinergia a respeito da suma dos votos das distintas correntes independentistas finalmente nom foi real, já que somando os votos da FPG e de NÓS-UP na eleiçons autonómicas deste mesmo ano, acadam-se 4.413 votos (0,26%). É dizer, II-SP nom só nom conseguiu reunir o voto do independentismo “sociológico”, ou o descontento do BNG (aonde vao essa sangria de mais de 200 mil votantes?), senom que tampouco revalidou o voto independentista das últimas autonómicas. Para além de levar em conta que as eleiçons europeias nom som comparáveis com umhas autonómicas em nível de participaçom, também há que detectar certas eivas na candidatura de II-SP.

De facto, a candidatura de II-SP nom conseguiu cristalizar umha referencialidade forte na Galiza para o voto independentista já que sectores do soberanismo nom reconheciam a candidatura como propriamente “galega”. 

A dizer verdade, era difícil achar marcadores discursivos propriamente independentistas no discurso de II-SP, se calhar demasiado acaparado polo sempre polémico Ferrín. Nos primeiros segundos do vídeo eleitoral da candidatura o escritor afirma que: "A nossa candidatura nom é umha candidatura clássica, somos diferentes. Nos somos umha candidatura internacionalista de todos os povos de Espanha"; recuperando a ideia –da que seguramente nunca se saísse– dumha Hespanha com agá. O último discurso colgado na página da candidatura na Galiza, aliás, também prosseguia pola senda da “posiçom Luis Soto”, já que se centrava mais em conseguir o voto do autonomismo descontento do que em sublinhar a unidade do independentismo. Assim dizia: “Aos sectores do BNG, realmente existentes, que saben que nós temos razón, pedímoslles o voto. Como llo pedimos a outras correntes de pensamento e de acción encadradas partidariamente lonxe de nós pro que tamén saben que nós temos razón. E pedímoslle o voto ás multitudes conscientes do “desastre escuro” ao que nos levou a “cobiza burguesa” (Celso Emilio ven agora no noso auxilio).“ Sendo, por certo, o BNG a única força nacionalista que cita para além da FPG. Nengum gesto de agradecimento se pudo observar face as demais famílias independentistas, se calhar englovadas numha difusa referência a “grupos, partidos e fraccións ideolóxicas, activistas, individualidades e movementos sociais e culturais de toda Galicia“. Estas actuaçons somárom-se à crescente apatia face Ferrín nos últimos meses, por mor do apoio de sectores afins à FPG à candidatura oficialista da CIG na luita operária; e a presença de Ferrín, como académico da RAG, nos “Pautos de Lâncara” onde Feijoo e Barreiro assinavam a “pax linguística” o 17 de Maio, enquanto Compostela acolhia a manifestaçom mais grande da história em defesa da língua.
 
Crise de representaçom

Umhas eleiçons com 54% de abstençom servem para fazer-nos umha ideia da crise da representaçom que está a padecer a democracia formal. Nos anos 80 o filósofo francês Michel Foucault horrorizava-se da capacidade do estado moderno para ser um ente centralizador e totalizador à vez que individualizava as pessoas que ficavam sob o seu governo. Neste mesmo sentido aponta Rubert de Ventós: “A força de colonizar todos os recantos da vida social (a força de produzir, como já vimos, um ‘mercado’ de Estado, mas também umha ‘ecologia’ de ministério, umha ‘revoluçom cultural’ de governo, um ‘folclore’ de concelho, etc.) já nada semelha susceptível de canalizar cara acima as opiniões e as aspirações da gente. Daí a proliferaçom do abstencionismo, o passotismo, as sectas, o interesse só polos single issues, o desprestígio da política e o descrédito dos políticos (...) Assi é como a absorçom de todo sentido por parte do Estado remataria por neutralizar os mínimos de ‘participaçom’ requeridos para o funcionamento democrático. Como sabia Hegel, o sentido deixa de sê-lo quando a gente nom o ‘sente’ já –e esta falta de identificaçom com as regras de jogo poderia produzir o ‘paro técnico’ de um Estado moderno em transe de ‘morrer de êxito.” Em definitiva, e seguramente ainda mais numhas eleiçons europeias, o eleitor ou eleitora sinte cada vez mais que o seu voto nom serve para nada: “hoje é já um tópico que este Estado é grande e afastado demais para satisfazer as necessidades locais da vida quotidiana, e demasiado pequeno para enfrentar os problemas globais –dos geoestratégicos aos ecológicos. Mais que o lugar onde se tomam as decisões, dixo-se, a política aparece como aquele onde se gerem as consequências de algo que, como o clima e os ciclos económicos, a sobarda.”
 
A rebeliom, polo tanto, ainda nom sabe tampouco onde é que tem que agir, onde é que pode achar um ponto de Arquímedes no que pousar a sua alavanca de transformaçom social. O facto, deducível do que nos contava Rubert de Ventós, é que por primeira vez a luita anti-capitalista está orfa de comunidades identitárias, de solidariede e ajuda mútua. É difícil saber como pode agir o anti-capitalismo quando carece destas bases. Assim, e paradoxalmente, umha maior consciência anti-capitalista da populaçom coincide com o ponto máximo de individualizaçom e disoluçom dos vínculos fortes próprios das comunidades tradicionais da história. A rebeliom converteu-se, seguindo a Lipovestky, numha juxtaposiçom de narcisismos lúdicos, nas performances e happennings; que sinalam como pro-fascistas quaisquer intentos de construçom de comunidade.

“O primeiro partido obreiro é a abstençom”

Com o pano de fundo dumha crise financieira como escusa para depurar o capitalismo desses obstáculos que som as mínimas conquistas sociais alcançadas pola luita obreira e campesina durante todo o século, as eleiçons europeias atingírom o mínimo histórico de participaçom, com umha percentagem de 43,55. Constata-se a análise que Annie Collovald figera para o caso francês (http://www.humanite.fr/2006-04-21_Politique_-Le-premier-parti-ouvrier-n-est-pas-le-FN-c-est-l-abstention) durante a polémica da Frente Nacional de Le Pen: o primeiro partido obreiro nom é, desde logo, a extrema-direita, senom a abstençom. Nestes dias, vários cabeçalhos dos jornais empresariais acentuavam o crescimento da extrema-direita à vez que acusava o movimento obreiro de resgatar a xenofobia do III Reich que tornava os estrangeiros em bodes expiatórios dos problemas laborais. Nom surpreende, pois, que a crise nom se traduzisse em voto de esquerda. Após anos de liquidaçom da esquerda real na Europa ocidental, e mimetizaçom com o discurso neoliberal, o eleitorado, que escolhe “gestor”, aposta obviamente polo gestor, polo terratenente, polo “chefe” de sempre. Em certa medida, isto também atinge à esquerda galega aglutinada no BNG, que pretendeu ganhar contra os liberais no seu terreno de jogo.

A modo de conclusom

Os erros tácticos de Ferrín, contodo, nom deixam de ser anécdotas num guiom pré-escrito, e seria bem injusto culpá-lo de nom fazer algo que nunca prometeu. A candidatura de II-SP chegou de carambola, quase de surpreesa, e a sua pretendida referencialidade deveu-se ao intento de ilegalizaçom e a conseguinte solidariedade. Para a maioria da base nacionalista nom significou muito mais lá dum comité de solidariedade com o povo basco. Nom corresponde, pois, exigir maiores tectos a algo que está ainda verde.