Para NÓS-Unidade Popular, ao contrário do que alguns alarmistas tenhem vaticinado nas últimas semanas em relaçom aos resultados de 1 de Março, a eleiçom de Núñez Feijó como novo presidente autonómico galego nom vai supor grandes novidades na configuraçom do aparelho institucional da Autonomia. É verdade que o PP recuperou a hegemonia na Junta e um tecnocrata adscrito e ao serviço da grande burguesia galega-espanhola liderará mais quatro anos de política antigalega e direitista sem complexos.
No entanto, o próprio Alberto Núñez Feijó adiantou já algumhas linhas do que vai ser a sua acçom de governo, que incluirá, dixo, a manutençom de “todo o bom que fijo o bipartido anterior”. Realmente, nom vai ter necessidade de desmontar muita cousa, porque o PSOE e o BNG em nengum momento rompêrom significativamente a linha de continuidade de todos os anos anteriores de fraguismo, nem em política económica, nem de serviços públicos nem ambiental ou lingüística.
Daí que Feijó poda manter e incluso incrementar o número de privatizaçons e favores a sectores privados da sanidade, dos serviços sociais ou do ensino, sem necessidade de romper com as políticas de Tourinho e Quintana.
Também continuarám os privilégios e sobressoldos dos políticos, apesar de que a grande maioria do povo trabalhador galego, especialmente a juventude e as mulheres, vê piorar as suas condiçons de vida dentro da crise sistémica que vivemos.
Daí que Feijó nom precise de entregar o controlo da política energética ao grande capital espanhol e galego-espanhol, como sempre defendeu o Partido Popular, porque o PSOE e o BNG em nengum momento recuperárom para o sector público galego um segmento tam importante da nossa economia.
Daí que as agressons ao meio natural e à ordenaçom harmónica do território vaiam continuar a ser umha constante sob a batuta de Feijó, tal como a gestom do lixo, a poluiçom industrial e o modelo de transporte insutentáveis.
Daí também que a autodeterminaçom vaia continuar proscrita na linguagem política oficial da era Feijó, enquanto a adesom da Galiza autonómica à antidemocrática Espanha constitucional de 1978 será garantida polo espanholista PP, como antes foi garantida polos também constitucionalistas PSOE e BNG.
Daí que, em definitivo, Feijó poda dar-se ao luxo de garantir mais espanhol no ensino, nas instituiçons e na sociedade, na medida que os seus antecessores no cargo em nengum momento mudárom a tendência dominante de espanholizaçom social.
É evidente que a vitória de umha força tam reaccionária como o PP é umha péssima notícia para o povo trabalhador galego, mas é imprescindível que fagamos umha leitura correcta do que isso significa. Enquanto o PP mantivo os seus fiéis apoios eleitorais, o realmente significativo do dia 1 de Março foi que o PSOE e do BNG colheitárom o rejeitamento de dezenas de milhares de trabalhadores e trabalhadoras enganadas polas políticas continuístas dos últimos quatro anos.
É, por isso, imprescindível trabalharmos por construir a ferramenta política capaz de ganhar a adesom dessas dezenas de milhares de galegos e galegas que querem mais esquerda e mais soberania nacional para a Galiza. NÓS-Unidade Popular continua empenhada nesse labor e espera poder confluir com outros sectores do movimento popular com que coincidimos no fundamental: a luita contra Espanha e o capital, pola independência nacional e o socialismo.
Entretanto, hoje assistimos à eleiçom do 5º presidente Made in Spain para a Junta da Galiza.
Direcçom Nacional de NÓS-Unidade Popular
Galiza, 18 de Abril de 2009
Más información:
Si quieres contribuir a que Kaos en la Red pueda seguir publicando artículos como este, puedes hacer tu donación en:
| Paypal (seguro y permite diferentes formas de pago) |
Microdonación de 2 euros
| Donación de importe libre
|
|