As medidas da Xunta para inxectar liquidez nas granxas de leite non están a funcionar e moitas están a piques da quebra. Esta é a imaxe “desesperada” que pintaron os tres grandes sindicatos agrarios galegos antes de anunciar hoxe unha gran tractorada ao inicio das vacacións de verán.

A protesta comezará a partir do próximo luns 13 de Xullo en Santiago e Lugo. Sindicato Labrego Galego, Unións Agrarias, Xóvenes Agricultores e os cooperativistas de AGACA agardan reunir polo menos 6.000 vehículos pero estiman que incluso poderían triplicar esta cifra.

Ademais das capitais citadas, os gandeiros poderían ampliar a súa protesta a outras vilas. Será nunha “semana en branco” na que tamén haberá actos informativos aos cidadáns e protestas diante de industrias e hipermercados.

Os gandeiros do país levan máis de ano e medio protestando contra o prezo do leite. Con todo, o ton da convocatoria desta mañá foi especialmente duro. “Non é o intre de máis chamamentos a responsabilidade, é o intre de accións contundentes”, argumentou Roberto García de Unións Agrarias, sindicato próximo ao PSdeG. “Se non somos contudentes non nos van facer caso”, sumouse Francisco Bello, de Xóvenes Agricultores, colectivo próximo ao PPdeG. Carme Freire, do SLG (próximo ao nacionalismo) explicou que “a nosa intención non é ir contra a cidadanía” pero advertiu que “está en xogo a vida no medio rural”.

As industrias están a impor un prezo que non cobre o seu custe de explotación e asemade importan masivamente produto foráneo, sobre todo francés, por debaixo do mínimo estabelecido neses estados.

A nova Xunta do PP lanzou un plan para adiantar 110 millóns de axudas europeas ás granxas. A inxección de liquidez non está a funcionar, segundo os sindicatos, porque os bancos non están a aceptar os avais presentados polos gandeiros. Os sindicatos reclámanlle ao Goberno que actúe como avalista para poder obter o financiamento necesario para non ter que pechar. Ao mesmo tempo, ameazan con publicar o nome dos bancos que se negan a cooperar no plan e animar os gandeiros a retirar deles os seus fondos. 

“Temos un ERE no 100 por cento das explotacións de Galicia”, denunciou Roberto García de Unións. No país, hai unhas 13.200 granxas de leite, segundo datos oficiais. Nun ano pecharon 1.400 mentres que nas últimas décadas perdéronse máis de 30.000. Agora mesmo, hai cooperativas que levan 3 ou 4 meses sen cobrar como Celga, Leiteco ou Monteverde.

Os sindicatos advírtenlle á administración que non abonda con máis reunións e piden medidas urxentes. Para eles, o maior éxito da tractorada sería ter que desconvocala.