La organización d'esquierda soberanista acudió a la manifestación convocada polos movimientos sociales d'Uviéu escontra d'una ordenanza qu'a partir de xineru de 2010 reprimirá la llibertá d'espresión, atacará a los más desfavorecíos y desfavorecíes (probes, prostitutes, mocedá...) y ñegará'l derechu al usu de los espacios públicos a la ciudadanía.

La manifestación salió de la Estación del RENFE a les 20 hores y percorrió la cai Uría. A la mesma acudieron más de mediu millar de persones que desafiaron el fríu.

Fai! repartió centenares de panfletos con esti testu: 

[*+ ] Énte la que paez inminente entrada en vigor de la "Ordenanza de convivencia ciudadana" dende Fai!, organización d'esquierda soberanista, pescudamos qu'esta ordenanza penaliza y coarta d'una manera mui grave la llibertá d'espresión al traviés de campañes d'axit-prop o l'arte urbanu con penes de trés mil euros, por exemplu, al tiempu que tamién va torgar la mendicidá, la persecución a les prostitutes o de les espresiones populares d'ociu y consumu d'alcohol nes cais.

[*+ ]  Fai! entiende qu'en realidá l'Ayuntamientu d'Uviéu regula per escrito lo que venía asocediendo de facto nos últimos años, cola persecución de les formes alternatives d'espresión, negándonos los calces tradicionales de difusión de convocatories, campañes etc. a los coleutivos sociales d'Uviéu, afogando les reivindicaciones que-y molesten, nun conceyu nel que la democracia nun s'atopa per nenyuri. Un conceyu al que-y habríen de dar el premiu, tamién, de "espátula d'oru", arriendes de ser esta ferramienta indispensable nel llabor de les brigaes de llimpieza, con instrucciones precises pa la erradicación de cualisquier mensaxe "subversivu" que llegue a les cais d'Uviéu. Por supuesto, estes instrucciones que torguen la contrainformación nun se dan cuando se promocionen eventos como corríes de toros, circos o nes mesmes elecciones, tapando la voz de "los y les que molesten" pa que nun tengan espaciu pa la so espresión.

[*+ ] No que cinca al coleutivu inmigrante y a la xente más necesitao esta persecución fáise inda más ablucante, pretendiendo "llimpiar les cais de maleantes" al más puru estilu de la estrema derecha de les navayes y les esvástiques. Daquién habría d'entrugá-y a la Conceyala de "Seguridá Ciudadana" uvieína cómo va facer frente una persona indixente a una multa por mendicidá, si esta mesma ye la razón pola que malvive nes cais d'Uviéu, ensin programes de prevención y reinserción social nin viviendes sociales suficientes pa facer frente a una crisis de la que les y los probes nenguna culpa tienen. Al tiempu, perseguiráse l'exerciciu de la prostitución -nin siquiera a los usuarios- col acosu a les trabayadores. Nesti sen, brilla pola so ausencia'l debate ciudadanu y col propiu coleutivu de trabayadores sobre la so situación, demandes, espectatives etc. siguiendo col avezáu exerciciu de la hipocresía consistente en mirar pa otru llau y acoyer postures efectistes de cara a la sociedá como esta.

[*+ ] Tampoco podemos dexar de llau la idea qu'esporta esta conceyalía de la mocedá uvieíno, cola criminalización de les formes d'ociu y consumu d'alcohol nes cais, onde va acosase a les moces y mozos que tean en grupu -más de trés xuntos, como nes cárceles-, con una política de persecución y paternalismu, plantiando la dureza de les porres y les citaciones xudiciales frente a la formación de la mocedá en formes d'ociu alternatives o más atractives que les que se planteguen por un sector hosteleru que, otramanera, trema énte fenómenos nos que la mocedá ruempe los sos esquemes y les sos normes como nel casu del nomáu "botellón". Tamién tarán prohibíos los usos deportivos d'ociu de les víes públiques, como nel casu del skating, les bicicletes o'l patinaxe, curiosamente, ensin plantegar zones específiques pa la práutica d'estos deportes, quiciabes col enfotu de recaudar fondos ente una mocedá incapaz d'emancipase pa facer frente a la situación de bancarrota d'un ayuntamientu, consecuencia d'una xestión deficiente de munchos años.

[*+ ] Fai! vien de desendolcar un conciertu contra esta Ordenanza cellebráu el pasáu vienres 27 de payares, asina como de facer una propuesta de resolución que salió alantre nel Conseyu de la Mocedá pa que'l so presidente llevare a la Conceyala d'(in)seguridá ciudadana les propuestes de la mocedá uvieíno nesti sen, afitando tamién la consecución d'una acción de refuga al testu al traviés de la confección d'un mural reivindicativu escontra la ordenanza na sé del Conseyu de la Mocedá d'Uviéu.

ORDENANZA REPRESORA ¡NON!  

CONVIVENCIA CIUDADANA Y DEMOCRACIA DIRECTA Y ASAMBLEARIA ¡SÍ!

¡OTRU UVIÉU YE POSIBLE!