Desde as sete da mañá, grupos de traballadoras e traballadores da limpeza reunianse na Praza do Concello para organizar os piquetes e as primeiras accións desta xornada de folga na limpeza de edificios e locais. Estas e estes folguistas decidiron concentrarse diante de Eulen, unha das empresas que se nega a asumir as demandas laborais das traballadoras e traballadores da limpeza.

Piquetes informativos itinerantes

A seguinte parada dos piquetes informativos foi o Campus Universitario de Vigo, a zona do Cuvi en Cabral. Desde aquí, organizáronse cinco grupos de piquetes itinerantes: un trasladouse até o aeroporto, outro ao Corte Inglés, ao Alcampo e aos centros comerciais de Gran Via e Travesia.

Tamén tiveron presenza estes grupos de piquetes na zona de Peritos e Empresariais. Desde Torrecedeira, as traballadoras e traballadores da limpeza desprazáronse en manifestación pola Avenida de Beiramar, até o Centro Comercial da Laxe. A continuación a marcha continuou até o cruce da rúa Colón, onde os piquetes informativos entraron nas sedes de Caixanova, BBVA, Caixa Galicia, Banco Santander e Banco Pastor.

Ás 16 da tarde xuntábanse de novo estas traballadoras e traballadores para organizar piquetes informativos para ambulatorios e centros comerciais.

Alto seguimento da folga

Tránsito Fernández, secretaria comarcal da CIG Servizos, cifrou o seguimento deste paro nun 75%, e avaliou esta folga como "positiva porque se paralizou a universidade, as áreas comerciais e alí onde colaboramos co Metal, nos estaleiros e noutras empresas do sector, tampouco houbo actividade da limpeza".

Ademais, a sindicalista nacionalista informou de que o venres se realizarán asembleas de traballadoras e traballadores para decidir que novas accións tomar, e se se aproba a proposta de convocatoria de folga indefinida no sector a partir do luns 17 de novembro. 

Máis imaxes

Podedes atopar máis fotos na Galeria de imaxes da web