A CRMH despide a Millán Astray coa colocación dun cartel
MILLÁN ASTRAY ERA UN FASCISTA IMPRESENTÁBEL
NON ERA UN CORUÑES DE PRO. ¡ADEUS!
A Comisión pola Recuperación da Memoria Histórica da Coruña despediu hoxe a estatua de Milláns Astray coa colocación ás 12 da mañá dun cartel no lugar que ocupaba a estatua: “Millán Astray era un fascista impresentábel. Non era un coruñés de pro. ¡Adeus!”.
Para a CRMH hoxe é un día histórico porque se elimina o principal símbolo franquista da Coruña. Un día de gran alegría para todas as persoas demócratas, amantes da xustiza e da liberdade, e, especialmente, para as familias de todas aquelas persoas que foron vítimas da represión franquista.
Valoramos positivamente esta actuación do goberno municipal, aínda que chega con moito atraso. A CRMH sempre reclamou a súa retirada, que non debía estar relacionada co inicio dunhas obras de remodelación da praza que leva o seu nome. Non aprobamos tampouco o procedemento, xa que se fixo clandestinamente e con nocturnidade.
Estamos ante unha conquista democrática, que só pode molestar a uns poucos nostálxicos do franquismo e a algúns políticos locais, que seguen a defender os símbolos franquistas e cualifican como coruñeses de pro a significados fascistas.
É unha conquista democrática despois de moitos anos de traballo. Lembremos que no Pleno de 5 de xullo de 2004 presentábase unha primeira moción para a retirada da simboloxía franquista da cidade e que non foi apoiada polo PSOE e PP. Posteriormente, outras mocións para a retirada da estatua de Millán Astray nos Plenos de 2 de maio de 2005, 7 de novembro de 2005 e 4 de abril de 2007, contaron tamén co rexeitamento de PSOE e PP.
É tamén moi positivo que a estatua estea depositada nun almacén municipal e cuberta por un toldo, porque é impresentábel. Esperamos que a ministra de Defensa, Carme Chacón, atenda a petición que fai a CRMH na carta que foi entregada hoxe na Delegación do Goberno, e que a estatua non sexa levada ao Museo Militar. Estamos pola súa fundición e que o material sexa a base do monumento que imos levantar en lembranza das vítimas do franquismo na comarca. En todo caso, esta estatua non pode estar máis que no Museo dos Horrores do Franquismo.
Non entendemos cómo despois da retirada da estatua pode aparecer a placa de “Praza de Millán Astray”, cando o Pleno aprobou a súa eliminación o 7 de setembro de 2009.
Moitas grazas pola vosa atención.
A Coruña, 22 de xaneiro de 2010
Asdo. Rubén Afonso Lobato, responsábel de Comunicación.
Más información:
Si quieres contribuir a que Kaos en la Red pueda seguir publicando artículos como este, puedes hacer tu donación en:
| Paypal (seguro y permite diferentes formas de pago) |
Microdonación de 2 euros
| Donación de importe libre
|
