A CIG-Mocidade de Vigo despregou na noite do 2 de febreiro doce faixas polas distintas zonas de centros de traballo do Metal da comarca para chamar á folga do 5 de febreiro en solidariedade cos catro traballadores do sector que van ser xulgados nesa data. Asi, queren amosar a súa solidariedade con estes catro compañeiros, que como milleiros de traballadores do sector permaneceron en folga máis de quince días para demandar o cumprimento do convenio do Metal, e aos que agora a Fiscalia solicita até catro anos de cadea. 

Vulcano, Barreras, Polyships, O Porriño, Vincios, a Avda de Madrid, Coia, o Polígono de Valadares, e outros moitos foron os emprazamentos aos que se dirixiron aos mozos e mozas da central sindical nacionalista organizados na CIG-Mocidade en Vigo, para despregar estas pancartas baixo o lema "Folga o 5 de febreiro. Solidariedade cos 4 do Metal".

Chamamento á folga

Desde a CIG-Mocidade de Vigo fan un chamamento á mobilización o 5 de febreiro "para termos un paro maioritario no sector e amosar a total solidariedade de todo o sector con estes catro compañeiros".