[14/12/2009] A IX Asemblea de Colexio Profesional de Xornalistas de Galicia (CPXG), reunida o sábado en Santiago, aprobou o informe presentado polo seu decano, Xosé Manuel Pereiro, no que fai un chamamento a Xunta, empresas e sindicatos a implicarense na defensa dos empregos en condicións laborais dignas.
En concreto, o informe insta á Xunta "a velar polo cumprimento da legalidade e a vencellar as axudas públicas a proxectos empresariais e ao mantemento do emprego". Das empresas reclama "un esforzo para manter os postos de traballo que lles permitiron no pasado obter beneficios". Por último, o documento aprobado pola asemblea convida ós sindicatos de clase "a implicarse na defensa do colectivo do mesmo xeito que fan con outras profesións".
O máximo órgano de representación do CPXG ofreceuse de novo a colaborar nas accións reivindicativas convocadas polo Sindicato de Xornalistas de Galicia, tal e como fixo ó longo do ano que remata.
O decano, Xosé Manuel Pereiro, constatou no seu informe que "a situación laboral é, a día de hoxe, a principal preocupación dos xornalistas" e alertou de que "a reducción de persoal nas redaccións indice negativamente na calidade dos contidos e lesiona o dereito dos cidadáns a recibiren unha información, plural e de calidade".
O Colexio Profesional de Xornalistas de Galicia celebrará o vindeiro ano o décimo aniversario da súa constitución, aprobada polo Parlamento de Galicia. Pereiro convidou a abrir unha reflexión sobre os vindeiros dez anos "que serán os peores da historia para os medios de comunicación, pero, para o periodismo, van ser dos mellores". "O camiño que queda por percorrer é longo, pero nunca se deu un segundo paso sen dar antes o primeiro", concluíu.
O Colexio Profesional de Xornalistas de Galicia felicita a Manuel Rivas
A IX Asemblea do Colexio Profesional de Xornalistas de Galicia, celebrada este sabado en Santiago, acordou, a proposta do decano, Xosé Manuel Pereiro, felicitar a Manuel Rivas na súa toma de posesión como membro numerario da Real Academia Galega.
O CPXG acordou felicitar a Rivas, o primeiro colexiado en activo e tamén o primeiro xornalista en exercicio que entra na RAG, pola súa traxectoria profesional e literaria, que sempre discurriu, segundo salientaron os asistentes á Asemblea, na defensa dos valores democráticos e do idioma e da cultura de Galicia.
O recente académico é licenciado en Ciencias da Información pola Universidade Complutense. Formou parte da primeira Xunta de Goberno do CPXG. Traballou en varios xornais galegos, en TVE e TVG, fundou e dirixiu a revista Luzes de Galicia. Desde hai tempo, e na actualidade, desenvolve o seu labor profesional no xornal El País.
XUNTA DE GOBERNO DO CPXG
Colexio Profesional de Xornalistas de Galicia
xornalistas@xornalistas.com
www.xornalistas.com
Tel. 981 93 56 70
Fax 981 93 56 69
Más información:
Si quieres contribuir a que Kaos en la Red pueda seguir publicando artículos como este, puedes hacer tu donación en:
| Paypal (seguro y permite diferentes formas de pago) |
Microdonación de 2 euros
| Donación de importe libre
|
